лучший сайт где можно скачать шаблоны для dle 11.2 бесплатно

ҚМУ да Академик Чаржаў Абдировтың туўылғанына 85 жыл толыўы мүнәсибети менен республикалық илимий-теориялық конференция өткерилди

Усы жылыдың 20-ноябрь күни ҚМУ мәденият сарайында медицина илимлериниң докторы, профессор, Өзбекстан Илимлер Академиясы академиги, Қарақалпақ мәмлекетлик университетиниң биринши ректоры, белгили мәмлекетлик ҳәм жәмийетлик искер Чаржаў Абдировтың туўылғанына 85 жыл толыўы мүнәсибети менен  “Түслик Аралбойының медико-биологиялық ҳәм экологиялық машқалалары” атамасындағы республикалық илимий-теориялық конференциясы болып өтти. Оған Қарақалпақстан Республикасы Жоқарғы Кеңеси , Қарақалпақстан Республикасы Министрлер Кеңеси, ӨзИА Қарақалпақстан бөлими, Өзбекстан Республикасы Денсаўлықты сақлаў министрлигинен ўәкиллер, илимпазлар, ТашПМИ Нөкис филиалы ҳәм университеттиң профессор-оқытыўшылары, студент-жаслар ҳәм академиктиң шаңарақ ағзалары, шәкиртлери қатнасты.

Конференцияны университет ректоры Ахмед Реймов кирис сөз бенен ашып берди. Буннан соң Қарақалпақстан Республикасы Жоқарғы Кеңеси Баслығының орынбасары А.Ҳамраев, Қарақалпақстан Республикасы Министрлер Кеңесиниң Баслығы орынбасары М.Жуманов сөзге шығып, академик Чаржаў Абдировтың туўылғанының 85 жыллығы менен алымниң шаңарақ ағзалары, шәкиртлери ҳәм университет  жәмәәтин қутлықлап, конференция жумысына табыслар тиледи.




Конференцияда университет ректоры, техника илимлери докторы А.Реймов, университеттиң “Экология ҳәм топырақтаныў” кафедрасы профессоры, биология  илимлериниң докторы С.Мамбетуллаева, Өзбекстан Республикасы Денсаўлықты сақлаў министрлигиниң бас лепролог қәнигеси, медицина илимлери докторы, профессор Э.Эшбойев, ТашПМИ Нөкис филиалы “Медициналық биология, микробиология ҳәм гистология” кафедрасы баслығы, биология илимлериниң кандидаты, доцент Р.Нарымбетова ҳәм Өзбекстан Илимлер Академиясыныӊ Қарақалпақстан бөлиминиӊ илимий хызметкери Г.Сапарова сөзге шығып, академиктиң өмир жолы, ийгиликли басламалары, медицина илиминиң раўажланыўына қосқан үлеси ҳәм илимпаз қалдырған бийбаҳа мийрас ҳаққында айтып өтти.



Илажда атап өтилгениндей, Ҳүрметли Президентимиз М.Мирзиёев тәрепинен илим ҳәм билимлендириўге, бул тараўда хызмет еткен ҳәм бүгин күнде жемисли мийнет етип атырған инсанларға үлкен итибар қаратылмақта.

 Академик Ч.Абдиров өзиниң мазмунлы, бирақ қысқа өмири даўамында халқымыздың айдын келешеги ушын өзи таңлаған жолдан беккем исеним ҳәм табанлылық пенен алға илгерлеп, барлық сынақлар ҳәм қыйыншылықларды жеңип өтип, тынымсыз мийнет ҳәм изленислердиң нәтийжесинде илимде, билимлендириўде, медицинада, жәмийетлик ҳәм мәмлекетлик ислерде жетискенликлерге ерискен инсан.

Илимпаз медицина илимине тек республикалық емес, ал дүньялық көлемде айтарлықтай жаңалықлар киргизе алды. Билимлендириў тараўындағы ең үлкен жумысларының қатарына  университет ректоры болған дәўирди атап өтиў мүмкин. Оқыў орнының материаллық-техникалық базасын беккемлеўге үлкен үлес қосты ҳәм илимий-педагогикалық кадрларды таярлаўға басшылық етти.

Әзелден халқымыз билим, илим ҳәм дөретиўшилик мийнетти муқаддес ис, илаҳий қәбилет деп билген, талантлыны устаз, өнерлини шәкирт тутқан. Университти питкерип шыққан жаслар өндиристе ҳадал хызмети менен бәршениң ҳүрмет-итибарына ерисип атыр. Усындай ағла пазыйлетли кадрларды тәрбиялап камалға келтириўде әдиўли устаз, илимпаз ҳәм жақын мәсләҳәтшы Чаржаў Абдировичтиң де хызметлери айрықша екенлиги атап өтилди.

Конференцияда Қарақалпақстан Республикасының белгили мәмлекетлик ҳәм жәмийетлик ғайраткери Ү.Әширбеков, ӨзИА Қарақалпақстан бөлими баслығы Н.Айымбетов ҳәм басқа да көплеген жәмийет алдынғылары, университеттиң профессор-оқытыўшылары сөзге шығып, академик пенен бирге ислескен дәўирлерден есте қалған ўақыялар, сәўбетлес, пикирлес болып бир-бирине жол-жоба көрсеткени, оның үлкен ықлас пенен баслаған ийгиликли ислери, илимдеги жолы даўам етип, бүгинлигинде өзиниң жоқары нәтийжесин берип атырғаны, бул болса, Қарақалпақстан медицина илиминиң дүньяға шығыўына жол ашқанлығын айрықша атап өтти.



Бүгинги илимий потенциалға ийе университет жәмәәтиниң табысларының дереги буннан 42 жыл бурын тырнағы қаланған ҳәм келешектеги жетискенликлери ушын аянбай мийнет ислеген әдиўли устаз, академик Чаржаў Абдировтың баслаған басламаларының жемиси екенлигин айтқымыз келеди. Илимпаздың 85 жыллық юбилейи пүткил республика зиялыларының байрамы болып есапланады

Илимий-теориялық конференция жуўмағында академиктиң шаңарақ ағзалары   сөзге шығып, университет жәмәәти ҳәм конференция мийманлары ҳәм қатнасыўшыларға өз миннетдаршылығын билдирди.


Илаж шеңберинде академиктиң илимий мийнетлери, китаплары сондай-ақ, заманласлары, шәкиртлери тәрепинен жазылған еске түсириўлер орын алған көргизбе шөлкемлестирилди.

ҚМҮ Баспасөз хызмети

скачать dle 11.3
Сайтта қәте байқадыңыз ба?

Егер сайтта қате байқаған болсаңыз, сол текстти CTRL + ENTER менен белгилеп алып басың ҳәм бизге жоллаң

Курсы валют
Сораўнама
Сизди қайсы тараў жаңалықлары қызықтырады?
Бизди күзетип барың
  • Вконтакте
  • Facebook
  • Twitter
Мақалалар