лучший сайт где можно скачать шаблоны для dle 11.2 бесплатно

Қарақалпақстан республикасы жоқарғы кеңесиниң үшинши сессиясы ҳаққында мәлимлеме

Усы жыл 29-апрель күни Қарақалпақстан Республикасы Жоқарғы Кеңесиниң үшинши сессиясы болып өтти.
Сессияныӊ өзгешелиги соннан ибарат, сессия жумысы онлайн видео-байланыс тәризинде алып барылды. Сессияға Жоқарғы Кеңес, қала ҳәм район студияларынан Олий Мажлис Сенаты ағзалары, Жоқарғы Кеңес депутатлары, сектор басшылары, ҳүкимет ағзалары ҳәм ғалаба хабар қураллары ўәкиллери қатнасты.
Сессияны Қарақалпақстан Республикасы Жоқарғы Кеңесиниң Баслығы М.Ерниязов кирис сөз бенен ашты ҳәм алып барды.
Депутатлар сессияның Секретариатын сайлады ҳәм күн тәртибин тастыйықлады.
Сессияда депутатлар ҳәм сенаторлар Өзбекстан Республикасы Олий Мажлис Сенатының усыныслары менен таныстырылды. Бул усыныслар тийкарында жергиликли Кеӊес депутатлары менен сенаторлар «Сақаўат ҳәм жәрдем» улыўма халықлық ҳәрекети шеӊберинде белгиленген режелердиӊ өзлери сайланған округларда орынланыўын тәмийинлеў, коронавирус пандемиясыныӊ экономикамызға унамсыз тәсирин кемейтиў мақсетинде көрилип атырған илажларды халықтың арасында үгит-нәсиятлаў, яғный, депутатлар менен сенаторлардыӊ ғалаба хабар қуралларында, социаллық тармақларда шығыўын шөлкемлестириў, халықтың жәрдемге мүтәж қатламын ҳәр тәреплеме қоллап-қуўатлаўға өзлериниӊ үлеслерин қосып атырған исбилерменлерди хошаметлеў тийислилиги, бул депутатларымыз бенен сенаторларымыз алдына да бир қатар жуўапкерли ўазыйпалар қоятуғынлығы атап өтилди.Сессияда Ҳүрметли Президентимиздиӊ басшылығында елимизде пандемия тәсирин жумсартыў бағдарында кең көлемли илажлар алып барылып атырғанлығы, пандемияға қарсы гүресиў бойынша қабыл етилген бир қатар пәрман ҳәм қарарлар, сондай-ақ, ислеп шығылған бағдарламалар халқымыздың қәўипсизлигин, экономика тармақларыныӊ турақлы ислеўин тәмийинлеўде әҳмийетли орын ийелеп атырғанлығы айрықша айтып өтилди.
Бул мәселелер бойынша дүзилген арнаўлы комиссия ҳәмде штаб тәрепинен бүгинги күндеги жағдай турақлы қадағалап барылмақта. Айрықша атап өтиў тийис, коронавирус инфекциясына қарсы гүресте пидайылық көрсетип атырған медицина тараўы хызметкерлериниң мийнетлери өз нәтийжелерин бермекте.
Жақында Қытай мәмлекетинен келген бир топар медицина хызметкерлери елимизде коронавирусқа қарсы гүресиў бойынша көрилип атырған илажларға жоқары баҳа бериў менен бирге вирусқа шалынғанларды емлеў, медицина хызметкерлерин қоллап-қуўатлаў бағдарында алып барылып атырған жумыслар ушын Президентимизге өзлериниӊ миннетдаршылығын билдирип өткени пикиримиз дәлили болып табылады.

Ҳақыйқатында да, елимизде күн сайын бул кеселликтен шыпа таўып атырған наўқаслар санының артып атырғаны, кеселлениў көрсеткишлериниң пәсейиўи ҳәммемизди үлкен қуўанышқа бөлемекте. Бүгинги күнге дейин Қарақалпақстанда 62 пуқара толығы менен саўалып шығыў бахтына миясар болды.
Сессияда бүгингидей сынаўлы күнлер ҳәр биримизден жәрдемге мүтәж шаңарақларды социаллық қоллап-қуўатлаў ҳәм олардың бәнтлигин тәмийинлеў, кәмбағаллықты қысқартыў бойынша қосымша илажлар көриўди талап етип атырғаны айрықша атап өтилди.
Бул мәселелер бойынша Ҳүрметли Президентимиздиӊ басшылығында өткерилген видеоселектор мәжилислеринде жумыссыз ҳәм күнлик дәрамат тийкарында жасап келген пуқараларды жумыс пенен тәмийинлеў, жәрдемге мүтәж шаңарақларды қоллап-қуўатлаў мақсетинде «Сақаўат ҳәм жәрдем» улыўма халықлық ҳәрекетин мәҳәллелер, шаңарақлар кесиминде жолға қойыў бойынша анық ўазыйпалар белгилеп берилди.

Ҳүрметли Президентимиздиң бундай басламасы коронавирус пандемиясына қарсы гүресиўде ҳәм бул жағдайдан тезирек шығыўда тығыз бирге ислесиўди талап етпекте. Бул мәселелер бойынша 2 күн даўамында халық депутатлары қалалық ҳәм районлық Кеңеслериниң сессиялары өткерилип, тийисли қарарлар қабыл етилди.
Бүгинги пандемия ўақтында жәрдемге мүтәж ҳәм кем тәмийинленген шаңарақларға сонғы 3 күнниң өзинде 4 мыӊнан аслам  қәўендер кәрханалар өзлериниң басламалары менен шықпақта. Кәрхана басшыларының бундай қайыр-сақаўат жумыслары барлық қалалық ҳәм районлық Кеңес сессияларында тастыйықланған.
Ҳүрметли Президентимиз тәрепинен өз нәўбетинде усындай исбилерменлерди қоллап-қуўатлаў мақсетинде бир қатар пәрман ҳәм қарарлары менен бул кәрханаларға да кредит, лизинг ҳәмде салық төлемлеринен жеңилликлер берилиўин айтып өтиўимиз тийис.
Себеби, бул кәрхана басшылары тәрепинен келеси 3 ай даўамында 10 мың 646 шаңараққа 30 миллиард сумнан аслам материаллық жәрдемлер көрсетилиўи, 11 мың 594 пуқараның бәнтлигин тәмийинлеў бойынша өзлериниң усынысларын билдириўи үлкен әҳмийетке ийе.
Ҳүрметли Президентимиз тәрепинен белгилеп берилген ўазыйпалар тийкарында барлық қала ҳәм районларда «Сақаўат ҳәм жәрдем»  фондының ашылыўы мүтәж шаңарақларға жәрдем бериўде айрықша орын тутпақта. Ҳәзирдиң өзинде усы фондқа исбилерменлеримиз ҳәм пуқараларымыз өзлериниӊ қәўендерлик жәрдемлерин көрсетип баслады.
Күн тәртибиндеги тийкарғы мәселе – «Сақаўат ҳәм жәрдем» улыўма халықлық ҳәрекетин шөлкемлестириў арқалы халықтың бәнтлигин тәмийинлеў ҳәм социаллық қоллап-қуўатлаў илажлары ҳаққында Аймақларды комплексли социаллық-экономикалық раўажландырыў бойынша сектор басшылары – Қарақалпақстан Республикасы Министрлер Кеңесиниң Баслығы Қ.Сариев, Қарақалпақстан Республикасы Прокуроры Х.Каримов, Ишки ислер министри А.Темирханов, Салық басқармасы баслығы Х.Бекчановтың есабатлары тыңланды. Бул бойынша депутатлар тийисли қарар қабыл етти.
Қарар тийкарында секторлар кесиминде дүзилген жумыссыз ҳәм кем тәмийинленген шаңарақлардың дизими, оларға ықтыярый тәризде бириктирилген исбилерменлер, халықтың бәнтлигин тәмийинлеў, кем тәмийинленген шаңарақларды қоллап-қуўатлаў,  усы жумысларға белсене қатнасқан исбилерменлерге мәмлекет тәрепинен жеңилликлер берилиўин шөлкемлестириў бойынша илажлар бағдарламасы тастыйықланды.

Сондай-ақ, сессия күн тәртибиндеги мәселелер – Қарақалпақстан Республикасын 2019-жылда социаллық-экономикалық раўажландырыўдың жуўмақлары ҳәм 2020-жылғы экономикалық бағдарламаның ең әҳмийетли бағдарлары, ҳуқықбузарлықтың алдын алыў ҳәм олардың профилактикасы жағдайы додаланды. Бул мәселелер бойынша тийисли қарарлар қабыл етилди.
Сессияның күн тəртибинде шөлкемлестириў мәселеси көрип шығылды.
Қарақалпақстан Республикасы Жоқарғы Кеңесиниң Баслығы М.Ерниязов Жоқарғы Кеңестиң Нызамлылық, суд-ҳуқық ҳәм коррупцияға қарсы гүресиў мәселелери комитетиниң баслығы лаўазымына 2-санлы «А.Досназаров» сайлаў округинен депутат Зухра Реймованың кандидатурасын усынды.

Сессияда З.Реймова Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери комитетиниң баслығы лаўазымына тастыйықланды.
Сессияда Жоқарғы Кеңес Президиумының тийисли қарарларын тастыйықлаў ҳаққында қарар қабыл етилди.
Усының менен Қарақалпақстан Республикасы Жоқарғы Кеңесиниң үшинши сессиясы өз жумысын жуўмақлады.

Қарақалпақстан Республикасы Жоқарғы Кеңесиниң баспасөз хызмети
 
скачать dle 11.3
Сайтта қәте байқадыңыз ба?

Егер сайтта қате байқаған болсаңыз, сол текстти CTRL + ENTER менен белгилеп алып басың ҳәм бизге жоллаң

Курсы валют
Сораўнама
Сизди қайсы тараў жаңалықлары қызықтырады?
Мақалалар
Zaman.uz сайтының мобил бағдарламасы