лучший сайт где можно скачать шаблоны для dle 11.2 бесплатно

Мәжбүрий мийнетке тартылған Қарақалпақстанның 6 адамы Волгоградтан алып келинди

«Истиқболли авлод» Республика социал-информациялық орайының Қарақалпақстан Республикасы бөлимине 2020-жылдың 26-октябрь күни Қарақалпақстанда жасаўшы бир неше пуқаралар тәрепинен мүрәжат келип түсти.

Мүрәжатшылар өз жақынлары Волгоградқа жумыс ислеўге кетип байланысқа шықпай атырғанын, ең соңғы сөйлесиўинде жумыс ислеп атырған жеринде жасаў ҳәм жумыс ислеў шараяты төменлиги, айлықлары ўақтында берилмей атырғанын айтқан.

«Истиқболли авлод» Республика социал-информациялық орайының Қарақалпақстан Республикасы бөлими бул келип түскен мүрәжат бойынша Россия Федерациясының Ишки ислер министрлигиниң Волгоград областандағы бас басқармасына хат пенен сораўнама жиберип Өзбекстан Республикасы пуқараларының жумыс ислеп атырған жериниң мәнзилин көрсетип, жағдайға анықлық киргизиўди сорайды. Ишки ислер министрлигиниң Волгоград областандағы бас басқармасы хызметшилери мүрәжатта айтылған орынға барып, жерлеслеримизди көреди ҳәм олар менен сәўбетлеседи. Деген менен, пуқараларымыз, хатта көрсетилген ўәжлер надурыс екенин ҳәм жағдайларының жақсы екенин айтып «тилхат» береди. Жерлеслеримиздиң өзлери өз қоллары менен тилхат жазып бергени ушын, бул ис жабылады.

Усы ўақыя болғаннан кейин көп өтпей, сол жерде ислеп атырған бир жерлесимиз Волгоградтан шығып кетиўге ериседи. Ол Қарақалпақстанға келгеннен кейин, үйине келип өзи менен бирге ислеген жерлеслериниң аянышлы жағдайы ҳаққында олардың жақынларына келип мағлыўмат береди ҳәм жумыс ислеп атырған жерге Волгоградтың өзинен емес, Москвадан тексериў жибериў кереклигин ескертеди.

Жақынларының жағдайы ҳаққында хабар тапқан жумысшылардың Қарақалпақстандағы ағайинлери екинши мәрте «Истиқболли авлод» Республика социал-информациялық орайының Қарақалпақстан Республикасы бөлимине арза менен мүрәжат етеди. Пуқаралар Бөлимнен олардың Волгоградта ислеп атырған жақынларының жумыс ислеп атырған жерин Москвадан барып тексериў өткериўин сораған усынысы есапқа алынып, Москва қаласында жайласқан «Альтернатива» мәмлекетлик емес шөлкеминен жәрдем соралады. Мәлим бир ўақыт ишинде тийисли ҳүжжетлер рәсмийлестирилип Волгоградтағы жумыс бериўшиниң жумыс объекти Ишки ислер министрлиги қәнигелери менен биргеликте тексериледи ҳәм ҳақыйқаттан да жерлеслеримиздиң жасаў, жумыс ислеў жағдайы төмен екенлиги, айлықлары ўақтында төленбегени мәлим болады. Сонлықтан, оларды тез сол жерден алып кетиўдиң илажи көриледи. Белгили болыўынша, Волгоградтағы жумыс бериўшиде 15 жерлесимиз жумыс ислеп атырған болған. Солардан 6 адам елге қайтыўды соранған, қалған 9 пуқара өз ерки менен сол жерде қалыўын билдирген.

2021-жылдың февраль айының басларында 6 жерлесимиз Өзбекстанға алып келинди. Олардың жол ҳақылары Халық аралық миграция шөлкеми тәрепинен төлеп берилди. 6 пуқараның бузылған ҳуқықларын қайта тиклеў бойынша ҳәзирги ўақытта «Истиқболли авлод» Республика социал-информациялық орайының Қарақалпақстан Республикасы бөлими ҳәм Қарақалпақстан Республикасы Прокуратурасының Халық аралық бөлими жәрдеминде Россия Федерациясы Ишки ислер министрлигиниң Волгоград областандағы бас басқармасына пуқараларымызды мәжбүрий мийнетке тартқан жумыс бериўшиниң үстинен жынаят исин қозғаў ҳәрекетлери көрилмекте. 6 пуқара аман-есен өз үйлерине қайтарылып, ҳәзир жағдайлары жақсы.

Лолагүл Қаллыханова,
«Истиқболли авлод» Республика социал-информациялық
орайының Қарақалпақстан Республикасы бөлими қәнигеси,
журналист
скачать dle 11.3
Сайтта қәте байқадыңыз ба?

Егер сайтта қате байқаған болсаңыз, сол текстти CTRL + ENTER менен белгилеп алып басың ҳәм бизге жоллаң

Курсы валют
Сораўнама
Сизди қайсы тараў жаңалықлары қызықтырады?
Мақалалар
Zaman.uz сайтының мобил бағдарламасы