лучший сайт где можно скачать шаблоны для dle 11.2 бесплатно

Awqatlaníw baǵdaríndaǵí 5 haqíyqat


Bul maqalanı amerikalı shıpaker Deniel Amenniń «Deneńdi ózgertpekshi bolsań – miyińdi ózgert!» dep atalǵan kitabında keltirilgen waqıya menen baslamaqshıman.

Bul kitapta joqarı tabıslarǵa erisken, qábiletli sportshı haqqında sóz etiledi. Óziniń súyikli jumısı, shańaraǵı hám kópshilik háwes etkendey dáramatı bar bolsa da, onıń da ózine tán ázzi tárepleri bar eken.

Ol mazalı nárselerdi jewden ózin tutıp tura almaytuǵın edi. Óz nápsine kúshi jetpegenlikten, hámiyshe qaltasına qanday da bir konfeta yamasa shokolad salıp júrer, azanda da, túste de, keshte de olardı jey beretuǵın edi. Hátteki, geyde yarım aqshamda oyanıp alıp, bir-eki pechene yamasa konfeta jep, sońınan jáne uyqılar edi.

Barǵan sayın bul sportshınıń talabı ońınan kelmey basladı. Jarıslarda da áwmet onnan júz burdı, densawlıǵı, kúsh-quwatı da burınǵıday emes.
Deniel Amenniń atap ótiwinshe, mazalı nárseler insannıń miyine tap narkotik sıyaqlı tásir etedi eken. Olarǵa da organizm úyrenip qalsa, jáne talap ete beredi. Mazalı nárseni kóp jewdiń aqıbetinde bolsa, qandaǵı qant muǵdarı kóteriledi, onı jemegen waqıtta birden túsip ketedi. Bunıń aqıbetinde insan ózinde hálsizlik hám tınıshsızlanıwdı sezedi. Sonday-aq, mazalı zatlardı hádden tıs kóp tutınıw insandaǵı kognitivlik funkciyalar (miy menen baylanıslı processler: eslew, itibar qaratıw, teńsalmaqlılıqtı saqlaw, sóylew, alǵan bilimlerin ámeliyatqa engiziw qábileti, esap-sanaq júrgiziw, boljaw, rejelestiriw, qadaǵalaw hám t.b. qábiletleri) dıń buzılıwına alıp keledi. Nátiyjede onıń miynet etiw qábileti tómenleydi.

Sonıń menen birge, kóp mazalı nárse jew denede isiniw processlerin keltirip shıǵaradı, buwınlardıń awırıwına sebep boladı. Shireli ónimlerdi jaqsı kóretuǵın sportshılarda dene jaraqatlarınan soń sawalıw procesi de sozılıp ketetuǵınlıǵı anıqlanǵan. Itibar bergen bolsańız, bas awırıwı, túskin keypiyat hám dene salmaǵınıń artıwı da mazalı nárseni kóp jew menen tikkeley baylanıslı.
Qullası, sol sportshı Deniel Amenniń kóriginen ótiwge kelipti. Shıpaker oǵan, bárinen burın, miyin durıs azıqlandırıwı kerekligin másláhát beripti. Eger mazalı, shireli ónimlerdi jewden nápsin tıya alıwdı úyrense, hámmesi jaqsı bolıp ketiwin aytıptı.

Hár kim óz miyine ne nárse, qanday vitamin kerekligin biliwi tiyis. Bul baǵdarda eń dáslep awqatlanıw menen baylanıslı 5 haqıyqattı túsinip alıw kerek.
1. Ne nárse jeseńiz, siz solsız
Bul tuwrı mánide aytılǵan gáp. Máselen, deneńizdegi kletkalar pútkil ómirińiz dawamında jańalanıp turadı. Teri hár 30 kúnde tolıq jańalanadı. Demek, siz tutınıp atırǵan awqat kletkalardıń ósiwi hám regeneraciya (qayta tikleniw) sına xızmet etedi. Ol dene hám miyińizdiń jumısına da tikkeley tásir etedi. Eger jeńil-jelpi «fast-fud»lardı kóp jeseńiz, pikirlewińiz de jeńil-jelpi bolıp qaladı. Dene salmaǵı menen baylanıslı mashqalalardı aytpasaq ta boladı.


2. Awqat narkotik sıyaqlı tásir etedi
Siz jegen awqatıńız keypiyatıńız hám dene tonusıńızǵa tásir etiwin sezgen shıǵarsız? Máselen, kofe ishkennen keyin ashıwshaqlıǵıńız tutıp qalıwı múmkin. Óytkeni, biz tutınǵan ayırım azıqlıq zatlar miyimizge narkotiktey bolıp tásir etedi. Geyde awqat jegennen keyin biraz biytaqatlanamız. Sonıń ushın, bárqulla durıs awqatlanıwǵa háreket etiw kerek.


3. Awqatlanıw racionı
Awqatlanıw racionı ómirimizdegi barlıq nársege tásir etedi. Awqat jew – bul tek ǵana ash qarındı tınıshlandırıw usılı emes, al barlıq processlerge tásir etetuǵın faktor bolıp esaplanadı. Tómende usı processlerdi sanap ótemiz.
• Salamatlıq. Nadurıs awqatlanıw densawlıqtı jemiredi, sapalı hám durıs awqatlanıw immunitetti kúsheytedi.
• Pikirlew. Durıs awqatlanıw tez hám anıq pikirlew qábiletin jaqsılaydı, joqarı shekler, ullı tabıslarǵa qaray anıq baǵdar alıwǵa járdem beredi.
• Kúsh-quwat dárejesi. Siziń kúshli yamasa ázzi bolıwıńız jegen awqatıńızǵa baylanıslı.
• Sporttaǵı tabıslar. Nadurıs hám sapasız awqatlanıw shıdamlılıq jáne erk-ıqrardı jemiredi.
• Dene salmaǵı. Bul jaǵdaydıń tikkeley awqatlanıw menen baylanıslı ekenligin bárshe biletuǵın shıǵar.
• Sırtqı kórinis. Salamat racionǵa ámel etetuǵınlardıń sırtqı kórinisinde de salamatlıq, kúsh-quwat hám shıray sezilip turadı.


4. Aldaǵanǵa isenbeń
Ayırım jaǵdaylarda televidenie, radio, gazeta hám kóshelerdegi daǵazalarda házir kópshiliktiń súyip tutınatuǵın tez tayar bolatuǵın awqatlardı reklama etedi. Bul da biznestiń bir túri bolıp, olar óz ónimlerin kóbirek satıwdı rejelestiredi. Biraq, tez tayar bolatuǵın ónimlerdi qanshelli kóp tutınsaq, biziń bel aylanamızdıń ólshemi sonshelli úlkeyip baradı.
Sonday-aq, ata-analardıń ózleri de geyde perzentleriniń zıyanlı azıqlıq zatlarǵa úyrenip qalıwına sebepshi boladı. Máselen, «Jılaǵandı qoysań, shokolad beremen», «Aytqanımdı tıńlasań, konfeta beremen» dep shárt qoyadı. Jaqsı bala bolıwı ushın onı zıyanlı ónim menen sıylıqlaw ata-analardıń eń úlken qátesi.


5. Kimniń racionı jaman?
Jaslar hám óspirimler fast-fudlardı júdá jaqsı kóredi. Geyde ata-anaları da olarǵa óz sózin ótkere almaydı hám qálegen nársesin tutınıwına ruqsat beredi. Biraq, bul dáwirde qáliplesken ádetlerdi keyin ala ózgertiw qıyın boladı. Bul ádetler miydiń rawajlanıwına kúshli tásir etiwi múmkin. Óytkeni, miy 25 jasqa shekem ósip-rawajlanadı. Sonıń ushın da, jas óspirimlerdiń qanday awqatlanıwı oǵada úlken áhmiyetke iye.

Derek : t.me/densawliq24
скачать dle 11.3
Сайтта қәте байқадыңыз ба?

Егер сайтта қате байқаған болсаңыз, сол текстти CTRL + ENTER менен белгилеп алып басың ҳәм бизге жоллаң

Курсы валют
Сораўнама
Сизди қайсы тараў жаңалықлары қызықтырады?
Мақалалар
Zaman.uz сайтының мобил бағдарламасы