лучший сайт где можно скачать шаблоны для dle 11.2 бесплатно

Дәри муғдарына әмeл етиў шәртпе?!

 «Жаман шыпакер ҳәр бир кеселлик ушын жигирмалап дәри жазады, жақсы шыпакер болса жигирма кеселликке бир дәри жазады», - деп жазған еди Уильям Ослер.

Ҳәзирги күнде жақсы шыпакерлер көп пе яки жаманлары – бунысын билмедим-дә, бирақ ҳәр бир адамның денсаўлығы өз қолында. Шыпакер жазып берген дәрилерди өз ўақтында, орнында ҳәм белгиленген муғдарда қабыл етиў – кеселликке қарсы гүресиўдиң туўры жолы. Кери жағдайда, бир кеселликти кетириў нийетинде және бир нешесин арттырып алыў ҳеш гәп емес. Бул бойынша тараў қәнигелери төмендеги мағлыўматларды береди…

Не ушын дозаға итибар бериў керек?

Ҳәр бир дәриниң емлеў нәтийжеси, дозасы бар. Емлеў нәтийжеси дозасының өзи де ең жоқары (максимал) ҳәм орташа дозаларға бөлинеди. Олар бир неше қыйлы болады, яғный:

· бир мәртелик;
· бир күнлик дозалар.

Медицина әмелиятында наўқасларды емлеў ушын дәри препаратлары орташа бир мәртелик ҳәм күнлик ем дозасында бериледи. Көбинесе дәрилердиң орташа ем дозасы максимал дозаның ярымы яки үштен бир бөлегин қурайды. Максимал бир мәртелик ҳәм суткалық ем дозалары мәмлекетлик фармакопеясында (дәрилер ҳаққындағы нызамластырылған мағлыўмат) көрсетилген болады. Буннан сондай жуўмаққа келиў мүмкин, емлеў яки профилактика мақсетинде ислетилетуғын дәри препаратлары фармакопеяда жазылған белгили дозаларда усыныс етилиўи шәрт.

Егер дәрилер артықша муғдарда қолланылса, зәҳәрлениў ҳәм қолайсыз ақыбетлери жүз бериў итималы жоқары. Мысалы төмендеги ҳәдийсени келтириў мүмкин.

Т. исимли ҳаял уйқысызлыққа дуўшар болып, шыпакер қабыллаўына барады. Қәниге оған уйқыны жақсылаў ушын жатыўдан алдын 30 минут бурын бир таблетка ишиўди айтқан. Ҳаял болса биреўиниң орнына 3-4 ин қабыл еткен. Нәтийжеде онда зәҳәрлениў белгилери, яғный коматоз, уйқыдан оятып болмайтуғын ҳалат, дем алыўдың әззилеўи ҳәм және усыған усаған қолайсыз белгилер бақланған. Ақыбетинде наўқас емлеўханаға келтирилип, өмири зорға сақлап қалынады. Көрсетилген тез медициналық жәрдем емлеў усыллары арқалы ҳаял өзине келеди ҳәм жаны аман қалады.

Кери жағдайда…

Соны умытпаў керек, дәри препаратларын белгиленген дозадан кем яки надурыс қабыл етиў даўаның созылып кетиўи ҳәм аўырласыўына алып келеди. Мәселен, сульфаниламид препаратлардан тийкарынан иш өтиўинде, әсиресе, дизентерияда кең қолланылады. Көрсетпе бойынша усы дәрилер белгили кестеде берилиўи керек. Сонда наўқас тез тәўир болыўы мүмкин.
Егер де кесте бузылса, дәри қәлеген ҳәм еске түскен ўақта қабыл етилсе, кеселликтиң созылмалы түрге өтип кетиў итималы жоқарылайды. Өйткени кеселликти пайда еткен микроблар бул дәриге тез үйренип қалып, оның нәтийжеси сезилмейди.
Дәрилер тәсири дозасынан тысқары сыртқы ҳәм ишки факторларға да байланыслы. Буларға жас, жыныс, физиологиялық ҳалат, асқазан ҳәм ишектиң аўҳалы, дәрини аўқаттан алдын яки кейин қабыл етиў сыяқлылар киреди. Басқаша етип айтқанда, дәрилер унамлы тәсир етиўи ушын ҳәр бир наўқасқа индивидуал таңланады. Болмаса, олар пайда орнына зыян жеткериўи ҳәм аўыр ақыбетлерге алып келиўи мүмкин.

Көпшиликке белгили, аспирин (ацетилсалицилат кислота) дене ыссылыған түсириў мақсетинде, асқынланыўға қарсы дәри сыпатында кең қолланылады. Егер бул препарат аш қарынға ишилсе, асқазан аўырыўы, кекириў, кеўил айныўына алып келеди. Ашынарлы болса да айтыў керек, оны ишиў ақыбетинде асқазан яки ишек жарасы жүзеге келип, оннан қан кетиўи нәтийжесинде наўқас дүньядан өткени ҳаққындағы өмирлик мысаллар да бар. Сол себепли бул дәрини (таблетка көринисинде болса) алдын азырақ шайнап, кейин сүт пенен бирге яки аўқаттан соң ишиў усыныс етиледи.
Қан басымын түсиретуғын дәрилердиң айырымлары узақ ўақыт аш қарынға қабыл етилсе, асқазан-ишек системасына унамсыз тәсир көрсетеди (асқазан аўырады, жүрек күйеди ҳ.т.б.). Соның ушын, мәселен, резерпин сақлаўшы препаратларды аўқаттан кейин қабыл етиў тийис. Жоқарыдағы себеплер себепли де бул дәрилер асқазан кеселликлеринде усыныс етилмейди.
Наркотик топарға кириўши күшли тәсирге ийе препаратлар жас балалар ҳәм кекселерге (60 жастан асқан) қадаған етиледи. Өйткени олар нерв системасына күшли тәсир етип, дем алыўды әззилетеди ҳәм қәўипли жағдайларды келтирип шығарады.

Сондай дәрилер де бар, оларды узақ ўақыт қоллаў рак кеселликлерин келтирип шығарыўы мүмкин.
Дәрилердиң тератоген тәсиринен өзимиз ҳәм перзентлеримизди сақлайық!

Дәрилерди өзбилерменлик пенен ҳәм надурыс ислетиў нәтийжесинде келип шығатуғын белгилердиң бири бул олардың тератоген тәсири есапланады. Әсиресе, олардың ҳәмилеге тәсири ақыбетинде бала нәгиран болып яки руўхый ҳәм басқа түрли аўыр кеселликлерге шатылып дүньяға келиўи мүмкин!
Дәрилердиң ҳәмиледарлық ўақтында тератоген тәсири белгили препаратлар қабыл етилиўинде сезиледи. Буларға айырым антибиотиклер, салицилатлар, диабет кеселлигинде буйырылатуғын базы препаратлар, кортикостеоидлер (гормонал дәри), паразитлерге қарсы қолланатуғын дәрилер киреди. Сол себепли бундай препаратлар ҳәмиледарларға усыныс етилмейди.

Дерек:
@densawliq24 Мағлыўмат«Шыпакер» газетасынан алынған
скачать dle 11.3
Сайтта қәте байқадыңыз ба?

Егер сайтта қате байқаған болсаңыз, сол текстти CTRL + ENTER менен белгилеп алып басың ҳәм бизге жоллаң

Курсы валют
Сораўнама
Сизди қайсы тараў жаңалықлары қызықтырады?
Мақалалар
Zaman.uz сайтының мобил бағдарламасы